Al het die sanger Dewald Wasserfall Suid-Afrika vir Nederland verruil, klop sy hart steeds warm vir sy geboorteland.
Ná ’n musiekstilte van vier jaar is hy terug met sy splinternuwe enkelsnit, “Kop en Hart”, wat fokus op die bekende innerlike stryd tussen die lewe wat jou kop kies en die plek waar jou hart werklik hoort.

Dewald Wasserfall se Tweestryd Tussen Logika en Emosie
“Kop en Hart” is geskryf deur die bekroonde liedjieskrywers Georic Lomas en Marco van Deventer, waarna Dewald Wasserfall self aan die lirieke geskaaf het om dit sy eie te maak.
Die tema is veral herkenbaar vir mense wat dit oorweeg om die land te verlaat of reeds oorsee woon. Terwyl logika dikwels geleenthede elders uitwys, bly die hart dikwels geheg aan die mense, herinneringe en plekke van jou herkoms.
Die vrystelling volg nadat Dewald Wasserfall vroeër vanjaar na Suid-Afrika teruggekeer het om aanhangers te bederf met geliefde treffers soos “Sewentien”, “Vergeet Wat Jy Weet Van Liefde” en “Elektrisiteit”.
Om ná vier jaar nuwe musiek uit te reik is vir hom beide opwindend en uitdagend in ’n vinnig veranderende bedryf. Die samewerking met Georic Lomas en Marco van Deventer het hom egter die geleentheid gebied om buite sy gewone kreatiewe kring te beweeg sonder om sy eie musikale identiteit te verloor.
Aangesien die sanger tans in Nederland woon, is daar nie dadelik planne vir ‘n Suid-Afrikaanse toer nie, maar hy bly ongelooflik dankbaar vir die voortgesette ondersteuning van sy plaaslike aanhangers.
Jy kan “Kop en Hart” HIER stroom/aflaai.
Hou jou ogies oop vir gereelde opdaterings in die Music News kategorie op Running Wolf’s Rant.
Wil jy jou besigheid, gebeurtenisse, produk of diens bemark? Ons kry meer as 14,000 bladsy-kyke elke maand! Kontak Ons vir bemarkings en reklame opsies.

