Kry jouself reg vir 3 Suidoosterfees Inry-Konserte in November

Die Suidoosterfees en Atlantic Studios laat die klassieke inryteater herleef. Van 4 tot 15 November 2020 word feesproduksies in ’n splinternuwe baadjie geklee, en kan groter gehore vanuit die gemak en veiligheid van hul motors na feesaanbiedings in die vorm van lewendige opvoerings op die verhoog en silwerskerm kyk.

Kaapse musiekliefhebbers kan onder meer uitsien na drie groter produksies met van ons land se voorste kunstenaars. Die kunstenaars tree op n buitelugverhoog voor die “gehoor” van motors terwyl beelde van die konsert ook  op`n reuse silwerskerm agter die verhoog, geprojekteer word. Die feit dat inry- musiekteaters `n nuwe inisiatief is, maak dat hierdie `n baie opwindende éérste ervaring sal wees vir almal wat die konserte bywoon.

Suidoosterfees Konserte - November 2020

Inryteatergangers skakel in op ’n FM-radiofrekwensie om in hulle motors na die klankbaan te luister. Die geleentheid voldoen volledig aan vereistes ingevolge die COVID-19- nasionale gesondheids- en veiligheidsregulasies.

Al die vertonings begin 20h00. Kaartjies is beskikbaar by Computicket. As julle 2 persone in ‘n voertuig gaan wees kos die kaartjies R250 en as julle 4 persone in ‘n voertuig is, kos die kaartjies R300.

Francois van Coke en Early B – Woensdag 4 November

Suid Afrika se grootste rocker en rymkletser saam op een verhoog! Francois van Coke is sinoniem met Afrikaanse rock, hy is welbekend as `n solokunstenaar en ook as die voorsanger van die groepe Fokofpolisiekar en Van Coke Kartel.

Francois Van Coke

Die gewilde rymkletser, Early B is welbekend vir sy vermoë om blitsvinnige ryme met ongeëwenaarde klarigheid te spoeg! Die musikale kragtoer met masjiengeweer ryme deur die formidabele rocker en rymkletser is beslis ‘n vertoning om nie mis te loop nie.

Klopse Jol! – Donderdag 12 November

‘n Unieke feesproduksie met Kaapstad se voorste kunstenaars wat die stad se ryke kultuurtradisies laat leef. Die Adams-broers saam met ’n eg Kaapse Maleierkoor, Klopsegroep en ’n tienstuk-orkes wat die voete sal laat jeuk. Daar sal ook `n paar opwindende gaskunstenaars wees, insluitende die talentvolle Nicoleen Saal, wat onlangs Maak my Famous reeks 2 op kykNET gewen het, asook Rjay en Lil-LK van die trefferlied “Wikkel.” `n Heerlike tradisionele Kaapse musiek-erevaring wat musiekliefhebbers nie sommer gou sal vergeet nie.

PJ Powers en die Tygerberg Kinderkoor – Saterdag 14 November

PJ Powers, ’n Suid-Afrikaanse legende, snoer talente saam met die Tygerberg-kinderkoor om hierdie musiek-extravaganza na die feesverhoog te bring. PJ se onblusbare energie, tesame met die mooiste koorklanke en haar uitmuntende orkes.

PJ Powers Singer

Feesgangers kan uitsien na treffers soos Welcome to Africa, The right to learn, Jabulani, Sanbonani, Destiny, The world in union en Shosholoza. Met PJ Powers en die Tygerberg Kinderkoor o.l.v. Karina Erasmus, ondersteun deur die PJ Powers band – Tigger Reunert (kitaar), Schalk Joubert (baskitaar), Rollins Mankge (klawers), Kevin Gibson (dromme).

Volgens professor Brian Figaji, voorsitter van die Suidoosterfees-direksie, is gehore uitgehonger vir teater- en musiekproduksies

Die fees se inryteater bied ’n veilige uitlaatklep, danksy die ondersteuning van borge en die samewerking met Atlantic Studios. Dié inisiatief bied ’n alternatiewe opsie vir optredes en voorsien broodnodige inkomste aan kunstenaars. Inryteatergangers kan ook uitsien na heerlike ‘roadhouse’-etes wat vanuit die kykNET Kokkedoorstoor voorberei word.

Ander opwindende Suidoosterfees- inryteater produksies om na uit te sien is onder andere: Die Variety Show that skriks vir niks, Lottering in Lockdown, Koortjies met Jonathan Rubain en Lag my kla’.  Die eerste Afrikaanse gospel-televisiereeks, Koortjies met Jonathan Rubain en vriende, is een van die gewildste reekse ooit op kykNET en Kie. Gaste wat in die reeks te sien was, kom byeen vir ’n aanskoulike verskeidenheidsvertoning by die inryteater. Vir die volledige program besoek HIERDIE SKAKEL.

Vir Kaapstad is die kykNET Atlantic Inryteater die ideale geleentheid om die kunste weer behoorlik te vier ná die grendelstaat. Daarom gooi Kaapstad haar deure wyd oop om kunsteliefhebbers van oral in die provinsie te verwelkom. Spesiale pakkette word aangebied om dit vir besoekers van buite die stadsgrense moontlik te maak om te kom deel in vermaak uit die boonste rakke. Verblyfpakkette by City Lodge is beskikbaar teen R1 600 vir twee persone, en sluit bed en ontbyt, ’n inryteaterkaartjie en ‘roadhouse’-ete in.

Hierdie inisiatief van die Suidoosterfees is moontlik gemaak deur die Nasionale Departement van Sport, Kuns en Kultuur, die Wes-Kaapse Departement van Kultuursake en Sport, Stad Kaapstad, kykNET, NATi, Die Burger, Media24, Smile FM en Atlantic Studios.

Wees op die uitkyk vir gereelde opdaterings in die Music kategorie op Running Wolf’s Rant.

  • 4
  • 8
  •  
  •  
  •  
  •  
  •  
  •  
    12
    Shares
  •  
    12
    Shares
  • 4
  • 8
  •  
  •  
  •  
  •  
  •  

Henno Kruger

Blogger, Desktop Activist, Twitter / Facebook Addict, Music Festival Addict, Avid lover of South African music, Founder and owner of Running Wolf's Rant

Leave a Reply