Dis asof die heelal ‘n ou bewaarde geheim verklap wanneer die sanger, Stiaan Reynierse en die groot liefde van sy lewe, sy kitaar, saam op die verhoog verskyn.
Dit is daardié soort talent wat die publiek in hul spore laat stop en gehore oorbluf uit hul stoele lig! Vanaf die openingsnote, dwarsdeur die vertolking van sy intense storielyne tot by die sluitklanke van sy liedjies, resoneer sy unieke rasperstem deur murg en siel lank nadat die gordyne gesak het.
Stiaan Reynierse het die kollig en verhoog al met verskeie musiekreuse in die bedryf gedeel en het dié ‘rocker’ die verhoogplanke al behoorlik laat brand met die kaggels in sy keel!
Sy splinternuwe album Anderkant die Reën is vandag vrygestel. Die album is saamgestel uit 8 radikale snitte wat deel uitmaak van die diskoers in Afrikaanse musiek.
‘Anderkant die reën’ is ‘n unieke album wat deur die kake van die mensdom se skedels breek en reis na ‘n dieper dimensie – dwarsdeur die vlak vleiswonde en permanente skade wat iewers tussen wieg en graf gebeur.
Die sanger verken die rimpeleffek van noodlottige emosionele beserings; die realiteit van oorsaak en gevolg; die duur prys van goedkoop foute; die vernislae en oëverblindery waarmee die wêreld die mensdom flous; die stryd tussen waarheid en leuen en die kuns van krygerskap in die komplekse reis van die lewe.
Die diep trefkrag van die titelsnit “Anderkant die reën” en Stiaan se aangrypende vertolking is rede vir hierdie liedjie as eerste enkelsnit vanaf die album.
“Partykeer moet mens maar aanhou wag… wag tot die reën homself uitreën” praat Stiaan vanuit ‘n plek vêr agter sy eie oë oor dié besonderse liedjie. “Niemand van ons word die storms van die lewe gespaar nie…”
Die genres wissel tussen vuurwarm rock en ballades met sterk storielyne wat onderwerpe vervat waaroor die samelewing oorversigtig is om hardop oor te praat.
Die album stroop die lae vernis wat die wêreld oor die ‘waarheid’ verf. Van die liedjies is geskoei op sentiment en die voortgesette vrae van die lewe, met Stiaan se eiesoortige hoendervleis-vertolking daarvan.
Na ‘n geruime tyd uit die publieke oog, het Stiaan Reynierse, bekende musiekvervaardiger, Theo Crous van Bellville Studios, musikant Albert Frost en digteres/liriekskrywer, Francis Grobler kragte saamgesnoer wat gelei het tot die geboorte van hierdie uitsonderlike album.
“Hulle was die medepligtiges…”, skerts ‘n beskeie Stiaan tong-in-die-kies, maar met groot waardering vir die ‘span’ waarvan Marius Nel die stuurman, anker en vlagdraer was.
Stiaan Reynierse en musiek is sinoniem
Daar is min instrumente wat hierdie veelsydige klankmaker nóg nie bemeester het nie. Sy kopgange is meerdimensioneel en veelvlakkig – sy denke, vry en sy tong uitgesproke.
Dis juis vanuit hierdie ongebonde plek waar digteres, vrydenker en liriekskrywer, Francis Grobler se ink en woordkuns en Stiaan se gedagtes en musiek meesterlik vervleg en konvergeer in buitengewone trefpunte.
“Ek en Francis loop ‘n lang-lang pad. Ek kies die temas van die liedjies en praat kortpad soos die kraai vlieg uit my hart en siel. Sy luister na my woorde, maar meer na die stiltes en goed tussen die lyne wat ek sukkel om te skryf of te praat. Ek dink ons maak mekáár moontlik…”
Stiaan was op die punt van ‘opgee’ na vele ontberings en beserings in die loopgraaf van die lewe.
Hy vertel: “Ek wou opgee.. glo my… Maar geen trane of reën of water alleen kon die vuur van klank wat in my brand blus nie…die waarheid móét uit.””
Anderkant die reën is die verbode geheim wat uiteindelik die “versigtige wet op swye” in skerwe breek. Dié album verdien beslis almal se volle aandag!
Meer inligting oor Stiaan Reynierse
Gebore, getoë en geskool in Middelburg, Mpumalanga, bruis die musiek reeds van kleintyd af deur Stiaan se are.
“My oupa het my leer kitaar speel. Dis by hom en oom Kobus Strydom waar ek geleer het dat ‘n kitaar méér as net hout en snare is… húlle, en my Dad het my die die ‘taal’ en ‘siel’ van musiek geleer”. Sedertdien, praat Stiaan vlot in die taal van musiek wat mettertyd sy enigste roeping, redding en rede geword het.
Stiaan Reynierse was lid van die Mpumalanga Prestigekoor-en-orkes en het later sy buiging op die land se grootste verhoë gemaak. In 2016 word sy debuut-album ‘Sonde’ vrygestel en is hy vir verskeie gesogte musiektoekennings genomineer.
Met rolmodelle soos Johnny Cash, Pearl Jam, Kings of Leon, Bob Dylan, Leonard Cohen en andere het die teater uit sy nate gebars met Stiaan se skitterende Pearl Jam huldeblyk-vertoning in 2018. Sy verbysterende weergawe van ‘Voshaarnooi’ in die fliek Ballade vir ʼn Enkeling is met ‘n staande ovasie ontvang.
Kyk die video vir “Anderkant die reën” hier onder:
Stroom Stiaan Reynierse se nuwe album HIER.
Hou jou ogies oop vir gereelde opdaterings in die Music News kategorie op Running Wolf’s Rant.
Looking for a gift for that special person in your life? Check out Netflorist.co.za, South Africa's top online florist and gift service. They offer flowers, gifts, and hampers for all occasions AND reliable nationwide delivery.
