Leo Sonskyn, die nederige sanger van Springs met ’n groot droom, laat harte weer klop met sy nuwe Afrikaanse enkelsnit, “Sondagmiddag Liefde.”
Dis nie net ’n lied nie – dis ’n gevoel van rus, ’n intieme ode aan daardie spesiale persoon by wie jy ten volle jouself kan wees.
Meer inligting oor Leo Sonskyn
Bekend van The Voice SA, Idols SA en Die Kontrak, het Leo deur die jare sy plek in die Suid-Afrikaanse musiekwêreld gevestig. Maar ondanks al die bekendheid, bly hy eenvoudig. Hy sê: “Ek’s net ’n huweliksmaat, ’n pa, en ’n gewone ou van Springs. Ek het eendag besluit ek het ’n droom, en toe het ek hom aangepak.”
Dis juis hierdie egtheid wat “Sondagmiddag Liefde” so besonders maak. Die lied is saam met William Wolf geskryf nadat William met ’n “cool melodie” vorendag gekom het. “Ons het sommer dadelik begin skryf,” vertel Leo Sonskyn. “Daai rustige gevoel van ’n Sondagmiddag saam met jou persoon het alles gedryf.”
Terwyl baie liefdesliedjies groot gebare vier, fokus “Sondagmiddag Liefde” op die klein, kosbare oomblikke – die stil tye wat dikwels ongemerk verbygaan, maar die kern van ware liefde vorm.
Die lirieke, soos “Ek soek jou laat Sondagmiddag liefde… Ek het nooit geglo in die hemel, maar nou lê die hemel net hier langsaan my,” is vir Leo diep persoonlik. Hy sê: “Ek het nooit gedink ek sal ooit ’n vrou hê nie. Soos party mense nie in die hemel glo nie, het ek nie geglo liefde gaan met my gebeur nie. Maar toe gebeur dit. Nou weet ek – hierdie is my hemel op aarde.”
Die musiekvideo is eenvoudig en opreg – presies soos die lied self. “Ons wou wys dat liefde nie gaan oor wie jy op ’n Vrydagaand saam wil wees nie, maar oor wie jy op ’n Sondagmiddag by wíl wees. Dít is liefde,” sê hy.
Die visuele styl van die video sluit perfek aan by die tematiek van die lied: sagte aanrakinge, rustige oomblikke, en twee mense wat mekaar werklik sien.
Kyk die musiekvideo hier onder:
Leo Sonskyn se musiekloopbaan het reeds op 14 begin en het hom van plaaslike verhoë tot in die Top 5 van Die Kontrak geneem. Met “Sondagmiddag Liefde” bewys hy dat daar in die Afrikaanse musiekruimte plek is vir sagtheid, stilte en opregtheid.
“In ’n wêreld wat so lawaaierig en gejaagd is, wil ek mense herinner dat liefde nie geskreeu hoef te word nie. Soms lê dit in ’n kyk, in stilte, in teenwoordigheid.”
“Sondagmiddag Liefde” is nou beskikbaar op alle digitale platforms. Sit terug, maak jou hart oop, en laat Leo Sonskyn jou herinner aan wat regtig saak maak.
Hou jou ogies oop vir gereelde opdaterings in die Music Videos kategorie op SA Music Zone.
Like what you just read? Buy us a coffee to enable us to bring you more content like this.
You're also more than welcome to subscribe to our newsletter to stay in the loop.
Feel free to explore our website or check out our Featured Articles.
Looking for a gift for that special person in your life? Check out Netflorist.co.za, South Africa's top online florist and gift service. They offer flowers, gifts, and hampers for all occasions AND reliable nationwide delivery.
