Sanger-liedjieskrywer Gerald Clark gee gestalte aan die universele gevoel van heimwee en verlange in sy nuwe Afrikaanse enkelsnit, “Soms wil ek huis toe kom”.
Die liedjie is gebore uit die ervaring van ver van die huis af wees sonder om ooit werklik van jou Suid-Afrikaanse roots los te kom. Clark woon al agt jaar in die Tsjeggiese Republiek, van waar hy gereeld deur Europa reis en deurlopend terugkeer na Suid-Afrika.
Die ontstaan van “Soms wil ek huis toe kom” neem sy begin op ‘n klein eiland in Indonesië, waar Clark vir drie maande gewoon het.
Tussen die branders en die rustigheid van die eilandlewe het die besef gegroei dat ‘n mens die wêreld kan verken terwyl ‘n diep verlange na jou eie mense en grond bly voortbestaan. Die enkelsnit is opgeneem by Sunset Recording Studios saam met die vervaardiger Fred den Hertog.
Die meegaande musiekvideo is deur Lucas Stander oor twee dae geskiet tydens ‘n beplanningsweek vir ‘n opwindende musiek-perdrytoer langs die Weskus.
Gerald Clark verduidelik dat hulle ‘n prentjiemooi roete te perd rondom Elandsbaai gevolg het, wat die gevoel van vryheid, avontuur en die roadtrip-tema van die enkelsnit weerspieël.
Kyk die musiekvideo hier onder:
Die 2027 Musiek-Perdrytoer
Van 3 tot 10 April 2027 pak Gerald Clark saam met sy mede-musikante Guy Collins en Werner van der Hoven ‘n perdetoer van om en by 100 kilometer aan.
Hulle sal vanaf Lambertsbaai na Elandsbaai ry en vandaar op teen die berg na Redelinghuys. Hierdie reis vorm ‘n kreatiewe soektog na inspirasie, stories en ‘n dieper verbinding met die Suid-Afrikaanse landskap, wat sal dien as die klankbaan vir sy opkomende nuwe Afrikaanse album.
Meer inligting oor Gerald Clark
Gerald Clark is ‘n bekende Suid-Afrikaanse sanger-liedjieskrywer en avonturier wie se musiekloopbaan in 2009 ‘n groot mylpaal bereik het met sy album Sweepslag, wat sowowel ‘n SAMA- as ‘n Tempo-nominasie ontvang het.
Oor sy loopbaan het hy vyf solo-albums en talle enkelsnitte vrygestel, terwyl die musiekvideo vir een van die snitte op sy album Black Water internasionale erkenning verwerf het met ‘n MTV Europe Animation Award-nominasie.
Hy staan bekend vir sy unieke kombinasie van musiek en avontuur – van surfing en kampering tot perdry – en bou sedert 2016 aan sy musikale loopbaan vanuit Europa terwyl hy nou met nuwe werk terugkeer na sy Afrikaanse wortels.
Hou jou ogies oop vir gereelde opdaterings in die Music Videos kategorie op Running Wolf’s Rant.
Wil jy jou besigheid, gebeurtenisse, produk of diens bemark? Ons kry meer as 14,000 bladsy-kyke elke maand! Kontak Ons vir bemarkings en reklame opsies.
