Liefde by die Dam is amptelik 10 jaar oud! Oud en jonk het op Saterdag, 18 April, saamgedrom om dié spesiale mylpaal in styl te vier.
Hoewel die oggend met bewolkte weer begin het, het die lug gou oopgetrek vir ‘n skitterende dag van topgehalte Suid-Afrikaanse vermaak.
Die sowat 15 000 feesgangers is bederf met ‘n ryk verskeidenheid kunstenaars. Van die legendariese klanke van Mango Groove en die rock-energie van Fokofpolisiekar en aKING, tot gunstelinge soos Die Heuwels Fantasties, Appel, Early B en Jack Parow. Selfs Kurt Darren het die skare verras met ‘n onverwagse verskyning vanaf ‘n spesiale dek, terwyl geheime gaste soos Riaan Benadé en Tasché ook die verhoog warm gemaak het.
Liefde by die Dam 2026 ‘n Fees vir die Boeke
Pierre Greeff, hooforganiseerder van Liefde By Die Dam en voorsanger van Die Heuwels Fantasties, beskryf die dag as een van die beste in die fees se geskiedenis.
Hy skryf die sukses toe aan ‘n wêreldklas produksiespan en die lojale ondersteuning van borge en vennote. Volgens Pierre was dit ‘n droom wat waar geword het om Mango Groove op die Liefde-verhoog te hê.
Claire Johnston van Mango Groove het ook haar lof uitgespreek oor die energie en die indrukwekkende produksiegehalte van die dag. Sy noem dat al elf lede van die groep dit gate uit geniet het om deel van die dekade-viering te wees.
Maak Reg vir die Volgende Rondte
As jy hierdie een misgeloop het, is daar goeie nuus op die horison. Liefde by die Dam is in Augustus vanjaar terug by die Emmarentia-dam in Johannesburg. Kaapstad hoef ook nie afguns te voel nie, want die fees skuif in November na Meerendal toe.
Hou die sosiale media-blaaie dop vir die amptelike aankondigings van die nuwe reeks kunstenaars en kaartjiebesonderhede. Elke liedjie wat op die dag weerklink het, was ‘n bewys dat hierdie fees ‘n onmisbare deel van die Suid-Afrikaanse kultuurkalender geword het. Dankie aan almal wat reeds vir ‘n dekade lank saam jol!
Hou jou ogies oop vir gereelde opdaterings in die Recaps kategorie op Running Wolf’s Rant.
Wil jy jou besigheid, gebeurtenisse, produk of diens bemark? Ons kry meer as 14,000 bladsy-kyke elke maand! Kontak Ons vir bemarkings en reklame opsies.
