Na die onvergeetlike sukses van die Mega Bonanza verjaardag-konsert by Emmarentia Dam in April vanjaar, is die Liefde-span amptelik gereed vir die volgende groot hoofstuk.
Die gewilde Liefde by die Dam-feesvieringe bereik vanjaar ’n mylpaal met die aanbieding van sy tiende-jaar vlagskip-konserte, wat weer eens die land gaan laat gons met ’n onverbeterlike kombinasie van musiek, passie en atmosfeer.
Op Saterdag 1 Augustus gaan die ikoniese Emmarentia Dam weer eens omskep word in ’n ware Liefde-wonderwêreld.
Feesgangers kan soos altyd ’n produksie verwag wat die asem wegslaan, gekenmerk deur wêreldklas klank en van die land se top musikale talente.
Liefde by die Dam-organiseerder Pierre Greeff verduidelik die filosofie agter die fees: “Ons kies kunstenaars wat ons wéét die verhoog behoorlik sal laat vlamvat. Ons wil hê die crowd moet ’n ongelooflike tyd hê.”
Die unieke karakter van die fees word verder versterk deur die uitstaande feesontwerp van Merwe Marchand. Hierdie visuele vernuwing, gepaard met die uitstekende tegniese versorging, sorg daarvoor dat Liefde by die Dam onbetwisbaar erken word as een van die mees indrukwekkende buitelug-feeste in Suid-Afrika.
Vir diegene in die Kaap, is daar ook goeie nuus: In November kry Kaapstad sy beurt met ’n feesdag op die pragtige Meerendal-landgoed net buite Durbanville.
’n Sterbelaaide Line-up vir Elke Smaak by Liefde By die Dam 2026
Of jy nou ’n liefhebber is van lekker Pop-musiek, of verkies om saam te skree met harde rock-musiek, hierdie jaar se program verseker dat daar ten minste een gunsteling-kunstenaar vir elke feesganger op die verhoog sal wees.
Emmarentia Dam (1 Augustus 2026):
Die line-up sluit in: Die Heuwels Fantasties, Francois van Coke, Spoegwolf, Early B, Eden, Juanita du Plessis, GString, Robbie Wessels, Die Piesangskille, Karlien van Jaarsveld, Ricus Nel, Riaan Benadé, Zaan Sonnekus, Moegoe, Bobby van Jaarsveld en Marno van der Merwe.
“Liefde By Die Dam plaas die feesganger se ervaring altyd eerste,” – So sê Hunter Kennedy wie reeds vir ‘n dekade lank in beide Die Heuwels Fantasties en Fokofpolisiekar by dié jaarlikse gewilde fees optree.
Kennedy vertel verder: “Die kurasie van talent word mooi beplan om seker te maak dat menige onvergeetlike oomblikke deur die loop van die dag geskep word. Die ontwerp van die dag self is in sy eie reg ‘n kunswerk. Daar is baie om jou te prikkel, jou aandag te hou en wonder te wek. Die smaakvlakke is volgens my superieur. Dus maak die Liefde die een onmisbare afspraak in enige kultuurvraat se kalender.”
Robbie Wessels het onlangs saam met Die Heuwels Fantasties en Jack Parow die lekker rugby-liedjie “Bomb Squad Blues” uitgereik. Die idee vir hierdie liedjie het hoeka agter die verhoog by `n Liefde by die Dam konsert ontstaan. Wessels vertel: “Liefde by die dam is een van daai feeste wat jy net moet bywoon om te verstaan waaroor dit gaan. Toe ek die eerste keer daar was het dit my asem behoorlik weg geslaan. Duisense jongmense met so baie gees wat elke kunstanaar se liedjies kliphard saamsing. Dit is iets ongeloofliks om te beleef!”
Juanita du Plesssis tree vir die eerste keer by Liefde op. Sy sê: “Dit is altyd vir my spesiaal om te hoor hoe amal die liedjies saamsing. Something old, Something new. Dis `n lekker samekoms vir die hele familie, oud en jonk. `n Moewiese Party!”
Die hekke maak 08h30 oop en die program vir die dag lyk so:
- 08:55 – Moegoe
- 09:10 – GString
- 09:35 – Marno van der Merwe
- 09:55 – Eden
- 10:20 – Juanita du Plessis
- 10:55 – Zaan Sonnekus
- 11:30 – Robbie Wessels
- 12:10 – Bobby van Jaarsveld
- 12:50 – Ricus Nel en Riaan Benadé
- 13:45 – Karlien van Jaarsveld
- 14:25 – Francois van Coke
- 15:05 –Die Piesangskille
- 15:35 –Snotkop
- 16:15 –Spoegwolf
- 17:00 –Die Heuwels Fantasties
- 17:35 –Early B
Meerendal (7 November 2026):
Die Kaapse fees spog met: Die Heuwels Fantasties, Fokofpolisiekar, Jack Parow, Early B, Bok van Blerk, Appel, Eden, Robbie Wessels, Riaan Benadé, Ricus Nel, GString, Zaan Sonnekus, Twee, Bernice West, Moegoe en Die Piesangskille.
Dit is trots Afrikaans, en dit is met Liefde aangebied! Die span agter die fees spreek hul dank uit teenoor die borge en vennote wat hierdie ervaring moontlik maak: Flying Fish, WeBuyCars, Virseker, LIFT en kykNET.
Kry jou kaartjies op Ticketmaster HIER.
Moenie hierdie landmerk-vieringe misloop nie – ons hoop om jou daar te sien!
Wil jy jou besigheid, gebeurtenisse, produk of diens bemark? Ons kry meer as 14,000 bladsy-kyke elke maand! Kontak Ons vir bemarkings en reklame opsies.
