Pak daai tas – want vyf van Suid-Afrika se gewildste manlike kunstenaars het saamgespan vir iets besonders: ’n “jagtrip” wat nie net as avontuur dien nie, maar ook as inspirasie vir ’n nuwe enkelsnit.
Ricus Nel, Ruhan du Toit, Chris Steyn, Bok van Blerk en Jay het hul passie vir die bos en kameraadskap verenig in ’n energieke lied met dieselfde naam: “Jagtrip”, nou beskikbaar op alle digitale stroomdienste.
Die lied is geskryf deur Georic Lomas en Marco van Deventer, wat self die idee gekry het terwyl hulle saam met vriende in die bos was.
“Ons kon nie regtig jag nie,” sê Marco, “maar ons het definitief die gees gebring.” Georic voeg met ’n glimlag by: “Daar is altyd daai ouens wat jag vir die trofees… en dan is daar ons – wat jag vir die gees.”
“Jagtrip” is ’n samewerking Vol Gees en Humor
Wat “Jagtrip” besonders maak, is hoe elke kunstenaar sy unieke geur bydra. Die lied is propvol persoonlikheid, humor en daardie spesiale kameraadskap wat net op ’n regte jagtrip ervaar kan word.
Jay deel: “Wanneer ek bos toe gaan, pak ek altyd my .300 WinMag, my jagpakkie, hoed en vellies, my fles, mes, flits, patrone – en natuurlik skoon onderbroeke!” Sy raad? “Los jou werk en alles wat jou pla by die huis, en geniet die bos.”
Bok van Blerk sluit aan met dieselfde tong-in-die-kies-humor: “Ek pak gewoonlik my kettie, ’n knipmes en onderbroeke… en maak seker mamma het blomme en dat die kredietkaart se limiet laag is voor ek gaan jag.”
’n Lied Vir Enigiemand Met Bosveld-In-Jou-Bloed
Of jy nou werklik op ’n jagtrip is, of net wens jy kon gaan – “Jagtrip” bring die gees van die veld reg tot by jou luidsprekers. Met ’n pakkende melodie, sinnige lirieke en die onmiskenbare stemme van vyf topkunstenaars, is hierdie lied gemaak om op repeat te speel.
Dis meer as net ’n lied – dis ’n uitnodiging om jou werk agter te laat, die flessie te gryp en die volume oop te draai.
“Jagtrip” is nou beskikbaar op Apple Music, Spotify en alle ander groot digitale platforms. Luister dit HIER.
Hou jou ogies oop vir gereelde opdaterings in die Music News kategorie op Running Wolf’s Rant.
