Vandag, Vrydag 28 Oktober 2022 sien die vrystelling van ’n splinternuwe album deur Bouwer Bosch, getiteld Briewe Uit Die Argiewe. Die album kom na die vrystelling van verskeie enkelsnitte vanaf die album, naamlik ‘Soos Ek Doen feat. Abby’, ’Sambreel’ en Bouwer se nuutste enkelsnit – ‘Skemer’.
Briewe Uit Die Argiewe is geskryf oor die laaste 3 jaar, en dis ook die rede vir die titel vir sy derde solo album. Meeste van die liedjies kom uit Bouwer se argiewe, met baie van die liedjies wat vir ander kunstenaars geskryf is, maar nooit gebruik is nie.
Bouwer Bosch verduidelik hoe Briewe Uit Die Argiewe gebeur het
“Ek het musiek op my rekenaar gevind wat ek in 2019 geskryf het, en gevoel die tyd is nou reg om hierdie stories te vertel. Ons lewe is ook een groot argief; met fotos en herinneringe van hoe ons groot geword het of net dinge wat ons laasweek gedoen het. Argiewe is deel van ons DNS.”
Die album is vervaardig deur Francois de Klerk, Austin Hlume, Tjaardt van der Walt, Ruan Graaff, Deon Volschenk en Bouwer Bosch self. Bouwer beskryf dit as ’n ongelooflike ervaring om soveel verskillende breine betrokke te hê by jou musiek. Die album is opgeneem by sy studio in Johannesburg.
Bouwer Bosch verduidelik sy doel met die album
“Ek dink daar is ‘n hongerte in my wat ek lanklaas beleef het rondom musiek, en ek wou net weer stories vertel met musiek. My lewe het baie verander toe ek begin TV en film werk doen; ek het musiek afgeskeep omdat daar nie tyd was nie, so ek wou net die laaste 3 jaar se gebeure in my lewe vasvang en dit deel.”
Die album bevat ’n verskeidenheid van samewerkings met onder andere sangers soos Almero, Loufi, Henru (’n nuwe kletsruimer van die Kaap) en Abby, en aanhangers kan uitsien na ’n mengsel van pop en dans treffers, sowel as dieper en ernstiger liedjies. Om saam met nuwe kunstenaars te werk, was nog altyd ’n groot liefde vir Bouwer; elke samewerking bring iets anders na die tafel, hy kan by almal iets leer en die resultaat is ’n opwindende album.
Bouwer Bosch beskryf Briewe Uit Die Argiewe as die album met die meeste diversiteit wat hy al gedoen het. Die feit dat die liedjies oor so ’n lang tydperk geskryf is, en dat hy met so baie vervaardigers vir die album gewerk het, verskaf meer diepte in die musiek; die musiek en lirieke het het kans gehad om volwasse te raak binne-in hom voor hy dit met die wêreld deel.
Bouwer Bosch deel nog informasie
“Ek hou maar daarvan om oor verhoudings te skryf. Nie net romanties nie, maar met jou God of geloof of waarin ookal jy glo, vriende, familie en met jouself. Ek dink die hooftema van die album is dat verandering nie net nodig is nie, maar deel is van die lewe.”
Om die vrystelling van die album te vier, stel Bouwer ook vandag ’n nuwe musiekvideo vir een van die liedjies op die album vry, naamlik “Hier By My”. Hy wou graag die liedjie deel met die wêreld omdat sy vriend, Ruan Jordaan dit geskryf het. Hy beskryf die liedjie as beslis nie ’n radio treffer nie – maar daar is iets aan die liedjie waarmee mense sal kan identifiseer. Die musiekvideo is deur Bouwer en Nico Welgemoed vervaardig en geskiet in Richmond in die Noord-Kaap in Augustus vanjaar.
Hier is die musiekvideo vir “Hier By My”
Bouwer Bosch lewer sy 2 sente oor sy album
“Ek is ongelooflik trots op hierdie album. Nie net oor die liedjies nie, maar ook net oor die hele proses. Om musiek te deel is ‘n weerlose oefening en hierdie is ‘n album waar ek beslis ’n ander kant van myself met die luisteraar deel. Ek dink die album is ’n baie ‘happy’ album en dit reflekteer beslis waar ek myself nou in my lewe vind.”
Jy kan Briewe Uit Die Argiewe HIER aflaai / stroom.
Hou jou ogies oop vir gereelde opdaterings in die Music News kategorie op Running Wolf’s Rant.
Want to promote your business, event, product or service? We get more than 14,000 pageviews a month! Contact us for marketing and advertising options.
