Die talentvolle sanger en liedjieskrywer, Christiaan Baartman, het nou maar een maal die gawe om musiek te gebruik om ’n kragtige boodskap oor te dra, en sy nuutste enkelsnit is ’n duidelike bewys hiervan.
“Vir Mekaar” is ’n inspirerende en hartroerende kreet wat Suid-Afrikaners aanmoedig om saam te staan, hulle eie potensiaal raak te sien en ’n beter land en toekoms te bou vir almal wat hier woon.
Nadat ’n vriend uit Australië die musikant onlangs genader het om die land te verlaat, het hy vir lank met die idee geworstel omdat hy nie geweet het wat die regte ding was om te doen nie. Die liedjie is letterlik gebore in ’n oomblik van klarigheid (3-uur in die oggend) waarin hy besef het dat hy in die land geplaas is vir ’n doel – om te help bou, beskerm, sorg en verenig.
Christiaan Baartman deel sy denke met ons
“As ek nou weghardloop, hardloop ek weg van my lewensdoel. Daarom sal ek bly, Dis ons keuse of ons gaan weghardloop of bly, baklei en saamstaan vir ’n beter môre en toekoms in die land waarvoor ons so lief is.”
Hierdie sentiment word versterk deur ’n treffende musiekvideo wat wys hoe mense regoor die land daagliks op hulle manier bydra tot die groei en ontwikkeling van die land.
Verder kan hierdie besonderse snit ook eersdaags gehoor word as die temalied van ’n betekenisvolle dokumentêr wat deur ’n groot Suid-Afrikaanse kultuurbeweging en ander besighede geborg word om hoop en motivering te saai.
“Vir Mekaar” is Christiaan Baartman se sewentiende enkelsnit in vier jaar en volg in die voetspore van sy jongste vrystelling, Vellies op die Dansvloer, wat baie goed ontvang is.
Christiaan Baartman is al vir 18 jaar in die musiekbedryf doenig, het al meer as ’n 100 liedjies geskryf, talle musiektoekennings gewen en al op groot verhoë opgetree plaaslik en oorsee. Hy het nog baie planne en drome vir die toekoms en voel bevoorreg om elke dag te kan doen waarvoor hy passievol is, in ’n land en taal wat hy onvoorwaardelik liefhet.
“Vir Mekaar” sal aanklank vind by almal wat meer wil doen as net oorleef en dra die kragtige boodskap dat dit moontlik is om geluk en vrede te vind in Suid-Afrika, as ons vir mekaar omgee en bereid is om saam te staan.
“Die lied beklemtoon dat ons sal saam staan vir wat reg is en nooit sal moed opgee nie,” sê Christiaan Baartman.
Christiaan het onlangs die liedjie opgevoer op die GROOT Ontbyt, kyk die video hier onder:
Hou jou ogies oop vir gereelde opdaterings in die Music News kategorie op Running Wolf’s Rant.
