Vir meer as 23 jaar vorm Francois van Coke en Hunter Kennedy se gesamentlike lirieke reeds die klankbaan van duisende aanhangers se lewens.
Benewens hul legendariese werk in die groep Fokofpolisiekar, het hulle saam treffers geskryf soos “Daarsy boys” en “Hartseer Freaks”, wat onder Francois se solo-vaandel uitgereik is. Nou is die duo terug met ‘n splinternuwe snit.
“Aksie braai”, wat heel gepas op Erfenisdag (Braaidag) vrygestel is, is egter glad nie jou tradisionele, opgewekte braailiedjie nie – trouens, dit is heel moontlik die hartseerste een nóg.
Meer inligting oor Francois van Coke & Hunter Kennedy se nuwe liedjie
Francois van Coke beskryf die enkelsnit treffend as “uitbranding toegedraai in ‘n braai song”. Hunter Kennedy verduidelik verder dat dit geskryf is vir daardie spesifieke tyd laat in die aand wanneer die vuur brand en die gesprekke diep raak.
Dit is ‘n liedjie vir daardie oomblik van wending wanneer jy ‘n bietjie moed nodig het; die kans om asem te skep voor die laaste naelloop tot by die eindlyn.
Die ongewone titel het ‘n nogal amusante agtergrond wat sowat twintig jaar terug dateer. Die twee musikante het ‘n onderhoud met die legendariese Springbok Os du Randt raakgelees.
Op die vraag na sy gunstelingfliek het Os “action” geantwoord, en sy gunstelingkos was eenvoudig “braai”. Die “action braai”-kombinasie was vir hulle so snaaks dat dit vir jare as ‘n binnegrap gedien het – dit was selfs vir ‘n ruk lank Hunter se Facebook-bio!
Terwyl die lirieke swaarder temas aanraak, bied die musiekvideo ‘n skreeusnaakse, ligte kontras. Die video speel af tydens ‘n komiese weergawe van die Braai Olimpiese Spele.
Francois van Coke en Hunter Kennedy vertolk die rolle van die groot underdogs wat moet meeding teen professionele, hoogs selfversekerde braaikompetisie-deelnemers in absurde sportsoorte soos die wors-aflos en potjie-kragdra.
Kyk die musiekvideo vir die liedjie hier onder:
Jy kan “Aksie braai” HIER stroom/aflaai.
Ek wil nou nie hoes, poep of skinder nie, maar hierdie mag dalk net een van die beste Afrikaanse liedjies van 2026 wees.
Hou jou ogies oop vir gereelde opdaterings in die Music Videos kategorie op Running Wolf’s Rant.
Wil jy jou besigheid, gebeurtenisse, produk of diens bemark? Ons kry meer as 14,000 bladsy-kyke elke maand! Kontak Ons vir bemarkings en reklame opsies.
