Van Der Aven is ’n onafhanklike alternatiewe rock groep wat bestaan uit drie lede, naamlik Roelof van der Merwe (skrywer, sanger en kitaarspeler), Theunis van der Merwe (sanger en baskitaarspeler) en Paul Avenant (sanger en tromspeler).
Die naam Van Der Aven is ’n samestelling van die lede se vanne. Al drie lede is Karoolinge met Paul wat vanaf Murraysburg afkomsig is en die twee broers vanaf Beaufort Wes.
Van Der Aven is in 2020 aangewys as die wenners van Band Or Bust by die 2020 US Woordfees en het al die geleentheid gehad om die verhoog te deel met kunstenaars soos Elvis Blue, Francois van Coke, Arno Carstens, Droomsindroom, Glaskas en Spoegwolf.
Ek het onlangs oor ‘n paar goedjies gesels met hulle, hier is wat Van Der Aven te sê gehad het.
Baie geluk met julle nuwe enkelsnit ‘Slaap jy Al’. Vertel ons meer van die liedjie en hoe die lirieke en musiek vir hierdie liedjie bymekaar gekom het?
“Slaap Jy Al vertel die storie van ’n verhouding wat op die rotse is en hoe maklik dit is om verby mekaar te lewe. Die hele idee was gevorm rondom ’n binnetoe- gesprek wat ’n mens laat aand het voor jy gaan slaap.”
“Die lied kom vra die vrae “Praat ons nog regtig met mekaar?” en “Hoe naby is ons om mekaar te verloor?”. Die musiek en lirieke van hierdie lied het hand aan hand vorm begin neem tydens die skryf proses en het sporadies gevorm tot die finale produk wat dit vandag is.”
Van Der Aven se eerste enkelsnit “Heimwee” doen baie goed op radio. Het julle dit verwag en hoe voel dit om jul eie musiek op radio te hoor?
“Die terugvoer wat ons ontvang vir “Heimwee” verbaas ons nog daagliks aangesien die oorspronklike lied nie iets was wat ons geken het nie.”
“Die gedig van JRL van Brugge kom wys net weereens hoe briljante lirieke/poësie grense en tyd kan oorskry. Dit is nog elke keer vir ons vreemd om ons eie stemme oor die radio te hoor, maar dit bly altyd opwindend en ’n groot riem onder die hart dat mense ons musiek geniet.”
Van Der Aven speel by die Feesterrein Musiekverhoog by KKNKop Saterdag 1 April 13h00 en Sondag 2 April 12h00. Wat kan die gehoor verwag?
“Hierdie jaar se KKNK sal ons eerste verskyning wees by die fees en ons sien geweldig uit! Ons het al drie groot geword in die Karoo en het gereeld die KKNK besoek gedurend ons kinderjare.”
“Die KKNK is die grootste fees naby ons tuis dorpe (Beaufort Wes en Murraysburg) en ons sien dit amper as ons tuis fees. Wat kan gehore verwag? Ons kom terug Karoo toe (KKNK toe) om ons stemme dik te maak en om vir gehore bloot te stel aan kwaliteit Afrikaanse musiek wat nie doekies omdraai nie.”
Hoe lyk julle dag op `n “show dag?” Is julle maar net betyds en speel of is daar `n spesiale manier van dinge doen?
“Ons fokus verseker daarop om betyds te wees! Enigeiets anders sal swak styl wees. Ons het nie noodwendig iets spesiaal wat ons op die dag doen nie, aangesien ons seker maak dat die meerderheid van die werk reeds agter die rug is teen “show dag”. Vir ons is dit belangrik om ten volle gereed te wees teen “show dag” en dan net op die verhoog te gaan en in die oomblik te wees en dit te geniet.”
Watter SA bands inspireer julle en hoekom?
“Ons vind inspirasie vanaf geweldig baie kunstenaars en genre’s, maar om net ’n paar uit te lig:”
“1. VanFokKingTasties (Van Coke Cartel, Fokofpolisiekar, aKing, Die Heuwels Fantasties) – sonder hulle sou alternatiewe Afrikaanse musiek nie wees waar dit vandag is nie.”
“2. Zinkplaat – hul “plat op die aarde” manier van die musiekwêreld betree en net hul self te wees.”
“3. Spoegwolf – hul ongelooflike dryfkrag en fokus om alles wat hulle al aangepak en verrig het en dit sonder ’n platemaatskappy.”
“4. Verder die hele MK89 beweging. Ek dink sonder die invloed wat MK89 op ons almal se vormings jare gehad het sou Afrikaanse musiek nie wees waar dit vandag is nie en die groei van Afrikaanse musiek en liriek sou drasties gely het indien dit nie vir MK89 was nie.”
Watter internaionalev kunstenaars inspireer Van Der Aven en hoekom?
“Hierdie is eintlik ’n geweldige lang lys, maar:”
“1. Onder andere Mumford and Sons, Bon Iver, Billie Eilish – Die gebruik van interessante harmonië in hul verwerkings is iets waarna ons geweldig streef.”
“2. Gangs of Youth, White Lies, Frightened Rabbit, Bruce Springsteen, Rod Steward, The Lumineers, Death Cab for Cutie, The National, Phoebe Bridgers etc. – Die skryf van lirieke wat ’n diep storie vertel en met dit, ongelooflike musiek te maak.”
“3. Kings of Leon, Biffy Clyro, Lake Street Drive – Hul gebruik van interessante ritmes en patrone in musiek.”
Waarna luister Van Der Aven in die motor as hulle op toer reis?
“Soos gesien kan word vanaf ons lys inspirasies hou ons van baie verskillende variasies van musiek. Ons het wel gewoonlik een song per toer wat gewoonlik oor en oor geluister word en hierdie word geindentifiseer binne die eerste paar ure van op pad wees. Voorbeelde van voriges sluit in Synth Peter se “Welkom in die Wildtuin” en Riaan Benade se “Rooiroknooi”.”
Wat is die beste raad wat julle al gekry het as `n band?
“Dit neem ’n leeftyd om ’n naam te maak en ’n sekonde om dit af te breek.”
Wat beplan julle vir die volgende 3 maande?
“Ons het twee splinternuwe enkelsnitte wat ons tans besig is om te voltooi wat ons graag binne die volgende paar maande wil vrystel.”
“Die een het ons saam met Theo Crous gewerk en vir die ander het ons saam met Loki Rothman gewerk. Verder, na KKNK, gaan ons vanaf 13 to 15 April saam met Glasklas en Van Reg en Rede ’n toer doen in die Boland. Daarna is ons later die jaar te sien by Courtyard in McGregor en dan by Melkfest in Pretoria.”
Waar kan fans en feesagente met Van Der Aven kontak maak?
“Hulle kan ons gaan volg op Instagram (@vanderavenband), Facebook (Van Der Aven), kontak by vanderaven@gmail.com, of net direk met ons kom praat na ons shows by KKNK!”
Ek wil vir Van Der Aven bedank vir hierdie onderhoud. Ek wens hulle als wat goed is toe vir die toekoms.
Hou jou ogies oop vir gereelde opdaterings in die Music kategorie op Running Wolf’s Rant.
Like what you just read? Join The Wolf Pack! Subscribe To Our Newsletter.
Explore our website, check out our Featured Articles or scroll down to see the articles that are related to this article below. We've been around since 2008, so there's plenty of content.
If you're in South Africa and looking for something to do, check out The SA Gig Guide (on our sister site SA Music Zone).
If getting more knowledge is part of your DNA - Check out the latest posts on Interesting Facts.
