Showmax het by die kykNET Silwerskermfees in Kaapstad aangekondig dat hulle ’n tweede seisoen van Koek in die oond gesit het. Seisoen 1 is een van die 10 Afrikaanse reekse met die hoogste stromingssyfers op dié stromingsplatform sedert dit in Februarie 2024, in vennootskap met Comcast se NBCUniversal en Sky, herloods is.
Dié Afrikaanse reeks kan hierdie Saterdag by die kykNET Silwerskerm Film- en TV-toekennings ses pryse wen – dit het die meeste benoemings van enige dramareeks.
Die benoemings sluit in: beste aktrise (Cindy Swanepoel); beste akteur (Stian Bam en Jacques Bessenger), beste vroulike byspeler (Sandra Prinsloo en Llandi Beeslaar) en beste manlike byspeler (Dawid Minnaar).
As die Kaapstadse huisvrou Christelle Smit oënskynlik bewyse ontdek dat haar man ’n buite-egtelike verhouding met ’n ontkleedanseres, ene Candi Floss, aangeknoop het, neem haar ondersoek haar na ’n wêreld wat ver verwyderd van haar bekende, voorstedelike utopie is.
Christelle word deur Swanepoel, wat verlede jaar vir haar rol as Annelize in Binnelanders Safta- en Silwerskermtoekennings ingepalm het, vertolk. Sy speel teenoor die skermlegende Prinsloo (The Gods Must Be Crazy), ’n bendebaas met voorliefdes vir brandewyn, sigare, luiperdpatrone, en niere steel. Dis nie lank nie, of Christelle maak droog en sy is diep in die skuld by Prinsloo se karakter, Moekie.
Die draaiboek is deur die Safta- en Silwerskermbekroonde reeksskepper Christiaan Olwagen (Kanarie, Recipes for Love & Murder), met die regie van dié Showmax Original (R18 DTNSG) deur die Safta- en Silwerskermbekroonde regisseur en kinematograaf, Johannes Pieter Nel. Nel word as “een van Suid-Afrika se belowendste jong talente” in Leon van Nierop se Rapport-resensie beskryf. Wolflight Films is die produksiemaatskappy.
Seisoen 2 van Koek sal in 2025 gereed wees om te verslind
“Christiaan Olwagen se konsep is net mal en ek is so dankbaar aan Showmax dat hulle gesê het, ‘Ja, go for it, vertel die storie in jou taal en moenie skaam wees nie, moenie terughou nie,” sê ’n verheugde Swanepoel. “Dít is beslis wat Koek onderskei.”
“Dit is so ’n eer om hierdie karakter te herbesoek en nog ’n seisoen te hê,” voeg sy by. “Christelle nou? Sy is edgy, sy is gevaarlik, sy is rateltaai. Moenie met haar mors nie; sy is deur baie. Maar sy is ook kwesbaar; wat sy in seisoen 1 gedoen het, is intens. Dit is nie net iets wat ’n mens sommer doen nie. Daar sal ook baie komiese elemente wees wat met die ernstige elemente vermeng. Dit is die soort storievertelling wat ek graag doen en ek kan nie wag om haar te vertolk en te sien waar sy nou is nie.”
MultiChoice Studios hanteer die internasionale verkope vir beide seisoene van Koek.
Terwyl jy was vir Seisoen 2, kyk solank Seisoen 1 van Koek weer (of vir die eerste keer) op Showmax.
Hou jou ogies oop vir gereelde opdaterings in die Television kategorie op Running Wolf’s Rant.
Like what you just read? Buy us a coffee to enable us to bring you more content like this.
You're also more than welcome to subscribe to our newsletter to stay in the loop.
Feel free to explore our website or check out our Featured Articles.
Looking for a gift for that special person in your life? Check out Netflorist.co.za, South Africa's top online florist and gift service. They offer flowers, gifts, and hampers for all occasions AND reliable nationwide delivery.
