Ná die ongekende sukses van “Toelaat,” slaan Bernice West en Droomsindroom ’n splinternuwe kreatiewe rigting in met die bekendstelling van Winter Hotel – ’n musiekprojek wat veel meer as net ’n nuwe band wil wees.
Met hul debuut-enkelsnit, “Heuning,” nooi hulle luisteraars in ’n nostalgiese wêreld waar musiek, stories en beeld saamvloei tot ’n unieke ervaring.
Die idee vir die projek het ontstaan ná Bernice West en Droomsindroom se suksesvolle samewerking op “Toelaat,” wat vyf opeenvolgende weke die nommer-een-posisie beklee en meer as een miljoen stromings behaal het.
Die oorweldigende reaksie het die kunstenaars laat besef daar is ruimte vir iets groters: ’n volwaardige nuwe band met sy eie identiteit, klank en storie, sonder om hul bestaande solo- en groepsloopbane te laat vaar.
Die Verhaal Agter die Debuut-Enkelsnit: ‘Heuning’
Winter Hotel se eerste enkelsnit, “Heuning,” fokus op die gevoel van verlief raak en die verwondering wat liefde weer in ’n mens wakker maak.
Die lirieke gebruik subtiele natuurbeelde – soos heuning in ’n Sondagoggend-koppie tee – om temas soos kwesbaarheid, vertroue en emosionele veiligheid te ondersoek.
“Ons hoop mense hoor nie net die liedjie nie, maar dat hulle hulself daarin verloor. As ‘Heuning’ iemand vir drie minute daardie sagte, warm gevoel van verlief wees kan laat ervaar, dan het die liedjie sy doel bereik,” vertel die groep.
“Heuning” is slegs die eerste hoofstuk van Winter Hotel se verhaal
Oor die volgende paar maande sal nóg musiek verskyn wat uiteindelik uitloop op die volledige kortspeler getiteld Winter. Die projek is gedurende die winter gebore, en dié seisoen speel ’n deurslaggewende rol in die atmosfeer van die musiek.
Die kreatiewe proses word gedryf deur hoofliedjieskrywer Kirsten Richard Schlebusch, met insette van Bernice West en Kyle Joshua Schlebusch, terwyl die bekroonde vervaardiger Peach van Pletzen verantwoordelik is vir die finale produksie wat warmte, eerlikheid en intimiteit skep.
’n Unieke Visuele Wêreld en Teaterervaring
Die visuele identiteit van Winter Hotel speel ’n ewe belangrike rol as die musiek. Vir die musiekvideo van “Heuning” is daar doelbewus wegbeweeg van tradisionele formate om ’n nostalgiese wêreld te skep, met spesiale kostuums deur Chantelle Schnetler Design en verhoogleiding deur teaterregisseur Jannes Erasmus.
“Ons droom is dat mense uiteindelik by ’n teater instap, iets te drink bestel, gaan sit en vir ’n uur lank heeltemal deel word van die wêreld van Winter Hotel. Die musiekvideo is amper soos die voorportaal van daardie hotel,” sê die kunstenaars.
Kyk die musiekvideo vir “Heuning” hier onder:
Met “Heuning” word die deur nou oopgemaak na ’n wêreld waar elke liedjie ’n nuwe kamer is om te ontdek.
Jy kan die liedjie HIER stroom/aflaai.
Hou jou ogies oop vir gereelde opdaterings in die Music Videos category on Running Wolf’s Rant.
Wil jy jou besigheid, gebeurtenisse, produk of diens bemark? Ons kry meer as 14,000 bladsy-kyke elke maand! Kontak Ons vir bemarkings en reklame opsies.
