Die Kaapse sangeres Dani Villé het in 2025 haar plek in die Afrikaanse musiekbedryf stewig bevestig met die vrystelling van gewilde enkelsnitte soos “Jy’s Okay”, “Ek Verkies Musiek” en “Insane.”
Met besprekings wat aanhou instroom, ’n optrede op Bok Radio se gewilde Bok Boot, én haar akteursdebuut in die rolprent “Mêdum die Movie” wat in Junie landwyd in teaters verskyn, is dit duidelik dat Dani se loopbaan ’n sterk opwaartse trajek volg.
Haar jongste enkelsnit, “Selfbewus”, bevestig weereens haar gemak met energieke rockklanke. Die lied word vergesel deur ’n lewendige musiekvideo waarin Dani se selfvertroue en lewenslus duidelik deurskyn. “Ek werk al jare lank hard aan my musiek,” sê sy. “Nou begin dit regtig voel asof dinge in ’n baie positiewe rigting beweeg. Ek is ongelooflik opgewonde oor wat voorlê.”
“Selfbewus” is vir Dani ’n diep persoonlike lied. Sy het dit geskryf ná die verbrokkeling van ’n hegte vriendskap. “Ons het eenvoudig uitmekaar gegroei,” vertel sy.
“Sy het my begin ignoreer en dit het my seergemaak, want ek het opreg omgegee. Haar motiewe het vir my oneerlik gevoel. Sy was baie gefokus daarop om met bekende en suksesvolle mense te assosieer, en het uiteindelik baie aangeplak en selfbewus geraak.”
Luisteraars sal op hul eie manier met “Selfbewus” kan vereenselwig – of dit nou ’n romantiese breuk was, of die verlies van ’n vriendskap.
Almal het al op ’n stadium seergekry deur selfbewuste mense, en Dani hoop dat die lied inspirasie sal bring vir dié wat dalk steeds in soortgelyke situasies vasgevang voel.
Die musiekvideo vir “Selfbewus” is verfilm deur Julius Bekker van Refined Photography en is op verskeie plekke in die Paarl geskiet.
“Dit is eerlikwaar die lekkerste musiekvideo wat ek nog ooit gemaak het,” sê Dani. “Ek kan nie wag om mense se reaksie te sien nie. Ek hou daarvan om met kleur en beweging te speel, en my gunsteling deel – buiten die lied self – is beslis die twee elektriese kitare wat ek gebruik het. Ek dink hulle gaan dalk selfs meer aandag trek as ek!”
Kyk die musiekvideo hier onder:
Jy kan die liedjie HIER stroom / aflaai.
Meer inligting oor Dani Villé
Dani Villé is ’n veelsydige musikant van Kaapstad wat as voltydse sangeres, musikant en liedjieskrywer floreer. Sy staan reeds van jongs af op verhoogde by privaat funksies, feeste, troues en korporatiewe geleenthede. Haar optredes sluit onder meer die KKNK (2015–2020), Paarlbergfees, Sonskynfees, Wyn-en-Wildsfees, The Daisy Jones Bar, The House of Machines en Die Blouhond Teater in.
In 2023 het haar musikale reis haar vir drie maande na Berlyn geneem, waar sy opgetree en nuwe inspirasie gevind het. Baie van haar musiek wat in 2025 uitgereik is, is juis daar geskryf.
Ná die vrystelling van haar debuut-EP, “Dani Villé”, in 2020 – met liedjies soos “Verdwaal”, “Twee keer”, “Ek soek net vir jou” en “As ek sing” – het sy ’n stewige aanlyn-teenwoordigheid opgebou op platforms soos Spotify, iTunes en Deezer.
Met ’n sterk begrip dat musiek ook ’n besigheid is, het Dani in 2020 haar Diploma in Musiekbesigheid aan die Campus of Performing Arts (COPA) in Kaapstad begin en suksesvol voltooi. Terwyl sy haar passie vir musiek voluit uitleef, bly sy toegewy aan haar kuns, met ’n besige optredeskedule en nog nuwe musiek wat oor die volgende jaar vrygestel sal word.
Hou jou ogies oop vir gereelde opdaterings in die Music Videos kategorie op Running Wolf’s Rant.
Wil jy jou besigheid, gebeurtenisse, produk of diens bemark? Ons kry meer as 14,000 bladsy-kyke elke maand! Kontak Ons vir bemarkings en reklame opsies.
