‘n Vlugtige Onderhoud met Schalk Bezuidenhout

Schalk Bezuidenhout is die MC by die Kaapstad edisie van Liefde By Die Dam 2019. Die eendag fees gebeur op die 16de November by Meerendal Wine Estate.

Ek het met Schalk Bezuidenhout gesels oor die fees en so paar ander goedjies. Hier is wat hy te sê gehad het…

Hoe besluit jy op jou dag se wardrobe?

Ek Google image ’80s icons’, maak my oë toe en kies een.

Wat is vir jou `n fashion no-no?

Ek dink nie ek is die beste persoon om te vra oor fashion no-nos nie… ek dra plakkies met Velcro straps.

• Save

Watter wyse woorde wat iemand al met jou gedeel het sal jou bybly?

Kyk, dink en druk ‘n drie. Ek lewe by hierdie slagspreuk. Dit was ook op my poster in matriek (al die hoofleiers moes posters maak om te staan vir hoofseun en hoofdogter). Ek was toe nie hoofseun nie, so noudat ek daaraan dink is dit dan seker nie so ‘n great slagspreuk nie.

Wat dink jy is die grootste pot snert?

Alles wat in ‘n instruction manual staan. Dis hoekom ek dit nooit lees nie.

Is jy nogal fitness en gesondheidsbewus? Oefen jy? Eet jy gesond?

Ek eet definitief nie gesond nie, daarom oefen ek. Ek woon in Linden in Joburg en ek draf maar so rond hier in die strate, maar ek dink ek gaan binnekort ophou. Mense ry gereeld verby my en maak dan insta stories van my wat teen ‘n bult uit draf… en as ek terwyl ek draf so kak lyk met ‘n filter op dan wil ek nie weet hoe dit lyk in die regte lewe nie.

Het jy troeteldiere?

Ek is die trotse pappa van 17 porseleindiere. Ek het begin net met honde, maar nou is daar ‘n kat, ‘n leeu en ‘n tier ook by. Hulle is almal baie soet. Hulle eis baie min kos, water en liefde. Hulle hou daarvan as ‘n mens soms hulle vryf met politoer en ‘n sagte lappie, maar dis maar al. Ons het ‘n regte hond probeer kry, maar die porseleinhonde het hom gebyt.

Wat is jou favorite troetelwoorde?

Ek het nie regtig nie, maar ek kan vir jou sê wat my least favorite is. Wanneer couples na mekaar verwys as ‘mamma’ en ‘pappa’. Dis wat jy jou ouers noem, so om die persoon met wie jy slaap dit te noem is weird of Freudian of albei. Ek en my meisie noem mekaar op die naam en as ons regtig romanties wil wees sit ons ‘n -tjie agteraan.

Praat so van Liefde, vertel ons van jou heel eerste soen met `n meisie?

Dit was op die nagbus oppad na ‘n voortrekkerkamp. Dit was ure van my hand al hoe nader en nader aan haar hand skuif, dan later hande vashou, dan later hand op die been, dan later lê op haar skouer, en uiteindelik later ‘n soen. Dit was daardie aand wat ek my Legend kenteken verwerf het.

Wat maak Liefde by die Dam vir jou lekker?

Ek love die verskeidenheid. Francois van Coke, Early B, Karlien van Jaarsveld. Moerse verskil tussen die performance en klank van al daardie kunstenaars. Ek hou ook van die bak koue bier wat verniet agter die stage staan.

Waarvoor kan Schalk fans uitkyk die volgende paar maande?

Na lekker foto’s van my Desember-vakansie op Instagram! Haha. Grappie. Maar ook nie. Dit was ‘n lekker besige jaar so in die volgende paar maande skaal ek bietjie af.

As ek sê afskaal bedoel ek ek skiet aan ‘n fliek en doen ‘n kleinhuisie vol gigs, maar meeste van die gigs is privaatfunksies soos corporate events. Volgende jaar in Januarie kom die nuwe seisoen van Hotel op KykNET uit en daarna wil ek graag ‘n nasionale toer van my Engelse one man show – SCHALKIE.

Maar ek is altyd besig met ‘n klomp verskillende projekte so mense kan maar net ‘n ogie op die ou Instagram page hou 😉

Ek wil die geleentheid gebruik om vir Schalk Bezuidenhout te bank vir hierdie onderhoud. Ek wens hom alles van die beste toe by Liefde By Die Dam 2019 Kaapstad. Ek hoop hy kry darem ‘n bier of twee verniet backstage.

• Save

Liefde By Die Dam 2019 Kaapstad info:

Jy kan Die Heuwels Fantasties, Francois Van Coke, Snotkop, Early B, Karlien Van Jaarsveld, Arno Carstens, Majozi & Loki Rothman live sien.

As jy nog nie kaartjies het vir die show nie, kry dit HIER.

Wees op die uitkyk vir gereelde opdaterings in die Humor kategorie op Running Wolf’s Rant.

Henno Kruger

Blogger, Desktop Activist, Twitter / Facebook Addict, Music Festival Addict, Avid lover of South African music, Founder and owner of Running Wolf’s Rant