Lucia Poggenpoel glo in tweede kanse met “As jy val”

ATKV-Crescendo-opnamekunstenaar Lucia Poggenpoel se enkelsnit “As jy val” is meer as net ’n lied – dit is ’n eerlike gebed, ’n proses van verwerking ná persoonlike trauma, en ’n stille getuigskrif van hoop.

Ná vyf maande van stilte en selfondersoek, keer Lucia terug met ’n snit wat met sy eenvoud, eerlikheid en kragtige boodskap diep in die hart insny: “As jy val, as jy val, moet jy weer opstaan.”

Die lied, geskryf aan die einde van November 2024, is die direkte gevolg van ’n tydperk van stilword, verlies en geestelike herfokus – ’n lied gebore uit pyn, maar vasgeanker in geloof.

“Ek het dit in die Bosveld geskryf toe dit gevoel het asof ek in die lewe gestruikel het,” vertel Lucia. “Soms gebeur daar soveel dinge wat die wind uit jou seile neem, en die tragiese verlies van my broer in 2021 was die finale slag. Hy was só lief vir musiek, en ek het geweet ek wil aanhou sing in die huis, net soos hy daarvan gehou het.”

Lucia sê dat haar pad na heling onlosmaaklik aan haar geloof gekoppel is: “Toe ek begin herstel, het ek geweet – hierdie keer is dit saam met God. Hy het my weer kom oplig toe ek gevoel het ek val. Die groot terugslag was daar, maar ek weet God is ’n God van tweede kanse. ‘As jy val’ is my getuienis.”

“As jy val” is opgeneem deur Graaff-produksies en is nou beskikbaar op Spotify en alle groot stromingsplatforms.

Lucia Poggenpoel se debuutalbum word op 15 Augustus 2025 bekendgestel tydens ’n spesiale optrede by die Daisy Jones-teater net buite Stellenbosch.

Kyk die video vir “As Jy Val” hier onder:

Meer inligting oor Lucia Poggenpoel

Lucia Poggenpoel, ’n Pretorianer wat haar B.Mus.-graad aan die Noordwes-Universiteit verwerf het, het nog altyd ’n liefde vir musiek gehad. In laerskool het sy in die koor gesing en klavierlesse geneem.

“Maar dit was eers in hoërskool,” vertel Lucia, “toe ek ’n solo vir my klavieronderwyser gesing het, dat die sangvirus my regtig beetgepak het.”

Lucia Poggenpoel se talent in die kunste strek egter veel verder as net musiek. Tydens haar studies het sy ’n professionele dramadiploma voltooi en in 2017 besluit om die drade van musiek, dans en drama saam te weef deur ’n Graad 8-musiekteater-eksamen af te lê. Benewens onderrig, tree Lucia gereeld op as ’n sessiemusikant. In 2023 is sy gekies om die ATKV se musiekmentorskapprogram in Paarl by te woon.

“Die program het vir my baie beteken omdat dit in die Paarl aangebied is, waar my broer ook gebly het. Hy is sowat twee jaar gelede oorlede, en ek het baie gesukkel om dit te verwerk. Die mentorskapprogram het my die geleentheid gegee om deur my rouproses te werk. Lirieke skryf is vir my baie helend.”

Vir Lucia is ATKV-Crescendo veel meer as net ’n mentorskapprogram. “Die mense betrokke by hierdie projek het my nie net musikale groei gebring nie, maar ook emosioneel.”

Hou jou ogies oop vir gereelde opdaterings in die Music Videos kategorie op SA Music Zone.

Like what you just read? Buy us a coffee to enable us to bring you more content like this.

You're also more than welcome to subscribe to our newsletter to stay in the loop.

Feel free to explore our website or check out our Featured Articles.