Met sy plakkies, sy sielvolle stem en sy opregte persoonlikheid het Chris Steyn die harte van Suid-Afrikaners gewen toe hy in 2023 as die wenner van die gewilde sangkompetisie Die Kontrak gekroon is. Sedertdien het hy nie net sy merk gemaak nie — hy het diep gewortel geraak in die plaaslike musiekbedryf.
Sy vorige enkelsnit, “Plaas Dorp Toe”, is steeds ’n gunsteling onder luisteraars en het hom gehelp om sy musiekdrome ten volle uit te leef. Dié liedjie het gemaklik sy plek in die Apple Music Top 10 verseker en bly ’n gewilde kuierliedjie reg oor die land.
“‘Plaas Dorp Toe’ is 100% een van die groot redes hoekom ek nou nog my droom kan uitleef en kan sing elke naweek voor mense. Die liedjie het my loopbaan baie, baie goed beïnvloed,” sê Chris dankbaar.
Meer inligting oor Chris Steyn se nuwe liedjie
Nou is dié gewilde sanger terug met nog ’n kuierliedjie – “In Die Bos”. Die nuwe enkelsnit is pas vrygestel en gaan oor die eenvoudige plesier van tyd spandeer in die bos – waar die bier net blykbaar beter proe.
Die liedjie is gebore uit ’n idee van Marco van Deventer en Georic Lomas, die kreatiewe span agter “Plaas Dorp Toe”, en Chris self het aan die skryfwerk deelgeneem.
“Ek het toe gehelp met die skryfwerk en dit was ’n baie lekker proses,” sê hy. Volgens Chris is daar nie ’n groot verskil tussen “In Die Bos” en sy vorige werk nie – dis steeds daardie “easy going” styl wat aanhangers van hom verwag en geniet.’ “Ek sien baie uit om te hoor wat die mense daarvan dink,” voeg hy by.
Die Musiekvideo is verfilm op asemrowende plaas
Dié liedjie word saam met ’n musiekvideo wat op die asemrowende Tilodi-plaas in Thabazimbi, Limpopo, verfilm is uitgereik. Die video is vervaardig deur die bekroonde span Eric T Graham en Tehan Buys van ETC Creative.
“Dis ’n ongelooflike mooi plaas en ons het baie pret gehad tydens die verfilming,” vertel Chris met ’n glimlag.
Kyk die video hier onder:
Chris Steyn se toekomsplanne en hoop vir 2025
Met “In Die Bos” wys Chris weer waarom hy een van die opwindendste stemme in Afrikaanse musiek is. “Ek hoop die luisteraars vind aanklank in die liedjie soos ek doen – en kuier lekker daarop. Daar is nog hope nuwe musiek op pad – 2025 gaan ’n groot jaar wees!” sê Chris.
“In Die Bos” is nou op alle digitale stroomdienste soos Apple Music, Spotify en Deezer beskikbaar. Kry dit HIER.
Hou jou ogies oop vir gereelde opdaterings in die Music Videos kategorie op SA Music Zone.
