In 2023 het die Afrikaanse musiekbedryf vir die eerste keer kennis gemaak met die blondekop sangeres Liza Nel en haar tong-in-die-kies treffer, “My Bok”.
In 2024 het sy die momentum voortgesit met “Rooi”, en nou is sy terug – sterker as ooit – met haar mees diepgaande werk tot dusver: die splinternuwe enkelsnit “Moes Maar Ek Moenie.”
Die liedjie is ’n spanpoging tussen Liza Nel, Bella Coleske, Georic Lomas en Marco van Deventer. Hierdie kreatiewe span het ’n musiekstuk geskep wat melodieus én emosioneel resoneer. “Dit was vir my die grootste voorreg,” sê Liza.
Sy beskryf die lied as ’n country-liedjie met ’n folky gevoel, soortgelyk aan die styl van The Lumineers. Die lirieke vertel van pyn, weerloosheid en uiteindelik, genesing. Dit gaan oor die vrees om weer lief te hê ná hartseer, maar ook oor die transformerende krag van onvoorwaardelike liefde.
“Elke mens was al op een of ander manier seer gemaak deur die liefde… Tot jy op ’n dag iemand ontmoet wat jou weer leer om lief te hê,” sê sy openhartig.
Liza Nel se storie van liefde en genesing
Hierdie lied is nie net fiksie nie – dis haar eie waarheid. Liza, wat getroud is met die bekende sanger Ricus Nel, deel dat die lirieke geïnspireer is deur haar eie reis in die liefde.
“Ek wil hê mense moet weet dat almal liefde verdien,” sê sy. “Die liedjie is ’n stuk van my hart wat ek met almal wil deel.”
Vir Liza is eerlikheid die kern van haar musiek. Sy glo dat luisteraars onmiddellik kan aanvoel of ’n kunstenaar opreg is. “Ek hoop mense sal kan vereenselwig met die liedjie en dat dit met hulle harte sal praat,” sê sy.
Saam met die enkelsnit is daar ook ’n pragtige musiekvideo, vervaardig deur Eric T Graham en Tehan Buys van ETC Creative. Liza beskryf die verfilming as een van die hoogtepunte van haar loopbaan. “Ek was só dankbaar vir elkeen wat betrokke was. Dit was rêrig ongelooflik!”
Die video is verfilm in ’n asemrowende veld wat Liza laat dink het aan die gewilde reeks Yellowstone, en die natuur het saamgespeel met ’n dramatiese sonsondergang. Vir Liza was dit asof “die Here persoonlik die toneel afgerond het.”
Vir die musiekvideo dra Liza ’n spesiale skepping deur Reandi Grey van GreyC Creations. Die rok is só besonders dat dit selfs kleur- en stylontleding deur Jeanne Pistorius van Kleurvol ingesluit het. “Ek het laas op my troudag so mooi gevoel,” glimlag sy.
Kyk die musiekvideo hier onder:
Van haar hare en grimering deur Suna Robberts, tot die agter-die-skerms koördinering deur Marco van Deventer, fotografie deur Hendri Viljoen, en regie van Georic Lomas – Liza is vol lof en dankbaarheid teenoor elkeen wat hierdie reis moontlik gemaak het.
Met “Moes Maar Ek Moenie” wys Liza Nel haar groei as kunstenaar en haar vermoë om diep emosies deur haar musiek te deel. Dis ’n lied wat waarskynlik sal aanklank vind by enigiemand wat al seer gekry het, maar steeds hoop koester vir liefde.
“Vir my is hierdie liedjie ’n liefdesbrief aan elkeen wat al seer gekry het, maar steeds glo in die krag van liefde,” sê sy.
Liza Nel se “Moes Maar Ek Moenie” is nou beskikbaar op alle digitale stroomdienste soos Apple Music, Spotify en Deezer. Luister HIER.
Hou jou ogies oop vir gereelde opdaterings in die Music Videos kategorie op Running Wolf’s Rant.
Wil jy jou besigheid, gebeurtenisse, produk of diens bemark? Ons kry meer as 14,000 bladsy-kyke elke maand! Kontak Ons vir bemarkings en reklame opsies.
