Koos Kombuis het geen bekendstelling nodig as dit by Afrikaanse en Suid-Afrikaanse musiek kom nie. Die legende sing al uit volle bors vir meer as 30 jaar en sy musiek en literatuur het ‘n oneindig-massiewe impak op ‘n groop groep Suid-Afrikaners (of ten minste die mense wat van goeie musiek hou en wat hou van lees).
Ek weet nie hoeveel keer ek al vir Koos Kombuis live gesien het nie, maar ek dink dit moet naby aan 30 wees, maar ek sal nooit die eerste keer in Navigators Ladies Bar in Kerk Straat in 1996 vergeet nie. Ek dink daai aand het Koos iets soos 4 bottels wyn uitgedrink op die stage en van sy liedjies se woorde vergeet, maar ek het dit baie geniet (en ek moet bylas dat ek pretty dronk was, ek was immers ‘n Pretoriaanse student gewees op daai stadium).
Ek wil nou nie lieg nie, maar ek dink daai was die eerste live band show wat ek gekyk in Pretoria, so dit maak die memory so ekstra bietjie spesiaal. Ek onthou ook nog die twee vertonings by Oppikoppi in 1998 (die eerste musiekfees wat ek bygewoon het) en die legendariese vertonings by dieselfde fees in 2004, 2009 en 2013 en dan voel ek sommer bevoorreg dat ek dit kon beleef het.
Tye het verander en deesdae drink Koos Kombuis nie meer 4 bottels wyn uit tydens sy vertonings nie, maar dis altyd pret om sy vertonings te beleef. Hy is een van die mense wat speel by Malkop Summer Rock Festival in Desember en as jy daar gaan wees, moet jy verseker nie sy vertoning misloop nie. Ek het ‘n kort geselskap gevoer met Koos Kombuis oor Malkop en so paar ander goetjies. Lees bietjie wat hy te sê gehad het hier onder.
Wat is jou definisie van ‘n Malkop ?
Haha, ek weet nie, ek het self nie geweet wat om te verwag toe ek die eerste keer ‘n uitnodiging kry na ‘n fees met die naam “Malkop” nie. Maar ek was aangenaam verras! Dit was wonderlik geleë, die mense was vriendelik en dit is hoekom ek vanjaar weer wil gaan.
Hoe sou jy sê het die Suid-Afrikaanse musiek bedryf verander in die laaste 30 jaar?
Die afgelope 30 jaar was daar ‘n ontploffing van plaaslike musiek, veral in Afrikaans. Die Afrikaanse musiek tans is ongelukkig meer kwantiteit as kwaliteit maar dis nie rede om mismoedig te word nie, ‘n besige musiekl-industrie is beter as geen musiek-industrie nie, en daar is heelwat om oor opgewonde te raak!
Wat is die snaakste ding wat al gebeur tydens een van jou vertonings?
Die snaaksste ding is nie iets wat met my gebeur het nie maar met iemand wat ek ken. By een van die Wingerd-Rock-feeste het die kitaarspeler van een van die bands so op en af gespring dat die verhoog onder hom meegegee en hy dwarsdeur geval het tot onder iun die backstage-area. Hy land toe op ‘n tafel waar ander musikante sit en drink, stof homself af, en merk op: “Don’t worry, it’s just a stage I’m going through.”
Wat kan musiek liefhebbers verwag van jou vertoning by Malkop Fees?
Ou en nuwer liedjies… en dalk ietsie heel nuuts van my nuwe album wat in 2017 verskyn!
Ek wil die geleentheid gebruik om vir Koos Kombuis te bedank vir hierdie onderhoud. Ek sien baie uit na sy nuwe album wat in 2017 gaan uitkom. Ek weet sommer dit gaan gatskop.
Wees op die uitkyk vir gereelde artikels in die Music en Interviews kategoriëe op Running Wolf’s Rant.
